الشات سبب تعاستى

الشات سبب تعاستي .. هل أصلح للزواج؟




مش عرفة ممكن حد يفهم انا عاوزة أقول ايه بالظبط .. أنا بداية عذابي و تانيب ضميري بدأت من سنتين تقريباً لما كنت بشوف صور تخص دراستي على منتدى وضغط على صورة من غير أقصد ولقيت نفسي في موقع لتحميل الصور كتبت اسم مستعار ثم اكتشفت انه شات ، كنت اسمع عن الشات بس عمري ما شفته و بصراحة انا لما دخلت كنت فرحانة في الاول بس مكنتش اعرف انه هيكون سبب تعاستي.

أول كام اسبوع كنت بدخل بالليل لاني كنت لسة مخلصة امتحانات ومتعودة على السهر ، بس بجد انا عمري ماعملت حاجة غلط فيه حتى مكنتش بحط صور ، ومكنتش بتكلم كتير بس كنت احب اشوف الكلام والمناقشات وكنت اصلي ركعتين واقعد على الشات شوية واصلي ركعتين واقعد شوية لغاية الفجر ، وبعد ما عودت نفسي اني انام بدري واصحى قبل الفجر بنص ساعة ، وبعد الفجر اقعد على الشات للضحى وكل يوم على هذا النظام ، وممكن اقعد العصر لمدة شهرين كاملين ، وانا مش بعمل أي حاجة تانية غير اني اقعد على الشات لغاية ما تكلمت مع شخص مرة ، وسألني أسئلة عادية يعني , المهم تاني يوم بالظبط كنت في الشات ، ودخل نفس الشخص وقال : "انا مش ممكن اتزوج واحدة متعهدة نت" وقال كلام تاني مش فاكراه وقال فيما معناه لو واحدة اتقدم لها شخص الفروض لا تقول له ابدا انها كانت تدخل على الشات .

انا انصدمت اوي معرفش ان دخولي على الشات غلط بالشكل ده انا كنت احسه غلط لاني بضيع وقت كبير فيه لكن مفكرتش فيه بالشكل ده ان ممكن خطيبي يسيبني لما يعرف اني كنت بدخل على الشات , وبعد الكلام ده انا مدخلتش لمدة لفترة طويلة وطول الوقت ألوم نفسي وساعات احس اني مظلومة لاني معملتش حاجة غلط وربنا شاهد عليا ازاي اتحاسب بذنب معملتوش ممكن يكون فيه بنات تدخل وتقول كلام غلط بس انا معملتش كدة وساعات اكره الشخص اللي قال كده لانه خلاني طول الوقت افكر ياترى لما اتخطب اقول لخطيبي اني دخلت على الشات قبل كدة ولا مقولش وياترى لو مقولتلهوش وهو اللي سألني الاول اكيد هيزعل لاني مقولتلهوش من البداية , طيب لو قررت اني اقوله هقوله امتى وازاي , انا معرفش ردة فعله هتكون ايه ممكن يقول لأهلي ويحرجهم و اساله كتير تدور في راسي من سنتين على الاقل مرة في اليوم افكر في الاسئلة دي ومش لقية اجابة تريحني وساعات اقول مش كتر خيره انه عرفني الحقيقة وهو بسببه انا كرهت الشات وبطلت ادخل لحد كبير بس اوقات كان يبقى نفسي انتقم منه ودخلت تاني الشات علشان اضايقه ودعيت ربنا اني اشوفه وشوفته فعلا بعد اكتر من سنة ونص في نفس الشات اللي مدخلتش غيره و ضايقته لاني كنت عارفة اشياء كتير عنه وهو طبعا مش فاكرني خالص , بس اضايقت من نفسي لاني بتصرف زي العيال ومش عارفة احدد المشكلة بالضبط .

واوقات اقول صاحب الموقع هو اللي غلطان لانه مكتبش على الصندوق من بره ان ده شات واكره صاحب الموقع بجد انا كرهت ناس كتير اوي وكرهت اللي عملوا الشات , انا الحمد لله دلوقتي مش بدخل بس خايفة اوي وحاسة اني هدخل تاني زي المرة اللي فاتت مش عارفة اعمل ايه , وساعات اقول لنفسي ما انا دخلت قبل كدة مرتين يعني لو قلت لخطيبي او جوزي كدة مش هيسامحني خلاص انا ادخل تاني واللي يحصل يحصل بس الحمد لله تحصل ظروف وما ادخلش انا متعذبة اوي ومش عارفة ارتاح من التفكير كل يوم يدور براسي نفس الاسئلة.